Mwynhewch ond peidiwch â tharfu ar eich cymdogion
Sŵn yw un o’r cwynion mwyaf cyffredin y byddwn yn clywed amdanynt gan ein cymunedau, ac mae’n gallu peri gofid neu straen.
Dyma rai pethau y gallwch eu gwneud i gadw’r heddwch a parchu eich cymdogion.
A ydych chi’n hoffi clywed eich cerddoriaeth yn uchel?
Os oes modd, cadwch eich teledu a’ch seinyddion cerddoriaeth ymhell i ffwrdd o waliau eich cymydog, a dylech eu codi oddi ar y llawr. Gallech roi cynnig ar ddefnyddio clustffonau hefyd.
Mae sain yn teithio, felly ystyriwch gau eich ffenestri a’ch drysau.
Trefnu parti
Mae eich cymdogion yn debygol o fod yn fwy amyneddgar os byddwch yn rhoi rhybudd iddynt ymlaen llaw – efallai y gallech ystyried eu gwahodd hyd yn oed.
Ystyriwch gymdogion sy’n gweithio shifftiau nos ac sy’n gorfod cysgu ar wahanol amseroedd o’r dydd a’r rhai sy’n oedrannus, y mae eu hiechyd yn wael neu sydd â babanod newydd-anedig.
Gofynnwch i’ch gwesteion gadw lefel y sŵn i lawr a pharchu eich cymdogion.
Beth ddylech ei wneud os byddwch yn cael problem sŵn?
A ydych chi wedi siarad gyda’r unigolyn sy’n achosi’r sŵn? Efallai nad ydynt yn sylweddoli eu bod yn creu niwsans.
Os nad ydych yn teimlo y gallwch siarad â nhw yn uniongyrchol, gallech bostio nodyn cwrtais trwy eu drws neu bostio llythyr atynt i sicrhau eu bod yn ymwybodol.
Os bydd y broblem yn parhau, ffoniwch 101. Gallwch adrodd am ddigwyddiadau i Adran Iechyd yr Amgylchedd eich cyngor lleol hefyd. Trowch at wefan eich awdurdod lleol am ragor o wybodaeth.
A yw’n wrthgymdeithasol?
Nid yw cael parti swnllyd neu chwarae gerddoriaeth uchel bob hyn a hyn yn cael ei ystyried fel ymddygiad gwrthgymdeithasol.
Fodd bynnag, caiff niwsans sŵn parhaus, fel cerddoriaeth uchel neu gŵn yn cyfarth yn rheolaidd, eu hystyried yn ymddygiad gwrthgymdeithasol, a byddem yn gweithredu yn ei gylch.
Yn yr achosion hyn, efallai y byddem yn gofyn i breswylydd gasglu tystiolaeth. Gallai hyn olygu lawrlwytho ap a recordio’r synau. Fel hyn, gallwn weld a yw’n creu niwsans bwriadol neu barhaus.
Gyda thystiolaeth, gallwn gymryd camau pellach, a allai olygu llunio Contract Ymddygiad Derbyniol, a fyddai’n sicrhau bod unigolyn yn atebol, a’u helpu i ddeall canlyniadau eu gweithredoedd, a chynnig cymorth er mwyn eu helpu i wella eu hymddygiad cyn y bydd angen cymryd camau cyfreithiol mwy difrifol.
Os bydd preswylydd yn torri amodau Contract Ymddygiad Derbyniol, gallem geisio cymryd camau cyfreithiol pellach.