Gyda’r tymheredd uchel diweddar sydd wedi torri recordiau, mae’n ymddangos yn rhyfedd siarad am wresogi.

Fodd bynnag, ar 1 Gorffennaf, cynyddodd y Cap ar Brisiau Ynni 13%. Golygodd hyn fod y bil blynyddol cyfartalog wedi cynyddu tua £221, o £1,641 i £1,862, neu fwy i aelwydydd sy’n defnyddio llawer o nwy a thrydan. Mae’r costau ynni uwch yn gysylltiedig ag ansefydlogrwydd byd-eang. Gwelodd pobl sy’n defnyddio nwy gynnydd mwy, gyda’r gyfradd uned yn codi 28%,  tra cynyddodd y gyfradd uned ar gyfer trydan 6%.

Gan fod y rhan fwyaf o bobl yn defnyddio llai o ynni yn ystod misoedd yr haf, efallai na fydd aelwydydd yn sylwi ar y cynnydd ar unwaith.  Fodd bynnag, os bydd y cap prisiau yn codi eto ym mis Hydref, gallai rhai aelwydydd ei chael hi’n anodd ymdopi.

Mae’r elusen Age Cymru yn dweud bod pobl hŷn eisoes yn poeni am sut y byddant yn talu eu biliau gaeaf nesaf, ac mae wedi galw ar Lywodraethau Cymru a’r DU i ddatblygu cynllun clir i gefnogi pobl hŷn ar incwm isel cyn y gaeaf.

 

Cymorth i aelwydydd

Mae gan Ofgem, y rheoleiddiwr ynni sy’n gyfrifol am osod y Cap ar Brisiau Ynni, gyngor i aelwydydd sy’n chwilio am help gyda’u biliau ynni.  ⁠

 

⁠Taliadau Tanwydd Gaeaf

Os cawsoch eich geni cyn 28 Mehefin 1960, gallech gael rhwng £100 a £300 i helpu i dalu eich biliau gwresogi ar gyfer gaeaf 2026 i 2027.  Gelwir hyn yn ‘Daliad Tanwydd Gaeaf’. Mae rhagor o wybodaeth am Daliadau Tanwydd Gaeaf ar wefan y Llywodraeth. ⁠ ⁠

 

Cymorth gyda chostau gwresogi olew ac LPG

Os ydych yn defnyddio olew gwresogi neu LPG, mae ceisiadau bellach ar agor ar gyfer y Cynllun Cymorth Tanwydd Gwresogi Oddi ar y Grid a rhaid eu cyflwyno erbyn 30 Medi 2026.
Wedi’i ariannu gan Lywodraeth Cymru a’i ddarparu gan awdurdodau lleol, mae’r cynllun yn cynnig taliad unigol o £200 i helpu aelwydydd incwm isel i ymdopi â chostau ynni cynyddol.

 

Pwy sy’n gymwys?

I fod yn gymwys, rhaid i aelwydydd: fod yn cael, neu wneud cais llwyddiannus am, y Cynllun Gostyngiadau’r Dreth Gyngor rhwng 1 Ebrill a 31 Gorffennaf 2026; a
defnyddio olew gwresogi neu LPG fel eu prif ffynhonnell gwresogi, gyda thystiolaeth megis bil yn ddyddiedig o fewn y 12 mis diwethaf.

Bydd hawliadau sydd wedi’u gwirio yn cael eu talu’n uniongyrchol i gyfrifon banc, gyda thaliadau’n cael eu gwneud cyn gynted â phosibl ac erbyn 31 Hydref 2026 fan bellaf.
Cysylltwch â’ch cyngor lleol am ragor o wybodaeth ynghylch sut i wneud cais yn eich ardal.

 

Rhesymau pam y gallai Undeb Credyd fod yn ddewis da ar gyfer eich arian

Mae undebau credyd yn gymuned gynyddol o gynilwyr a benthycwyr.

Ar draws Cymru, mae cannoedd o ganghennau undebau credyd a thua 80,000 o aelodau.

Maent yn gydweithfeydd ariannol sy’n berchen i’w haelodau – y bobl sy’n eu defnyddio.  Gyda’i gilydd, maent yn dal tua £53 miliwn mewn cynilion a £23 miliwn mewn benthyciadau.