Pethau i’w gwneud am ddim yn ystod gwyliau’r haf
Hwyl am ddim i deuluoedd yng Nghymru yr haf hwn!
Gyda’r gwyliau haf ar y gorwel, mae aelwydydd ar draws Cymru yn chwilio am bethau rhad neu bethau am ddim i’w gwneud gyda’r teulu. Dyma rai syniadau am fannau i ymweld â nhw a phethau i’w gwneud.
Archwilio’r byd y tu allan
Parc Cenedlaethol Bannau Brycheiniog
Ewch ar ymweliad â Bannau Brycheiniog i gael bod yn agos i fyd natur. Mae’r parc yn lle gwych i gael picnic ac ymlacio yng nghysgod mynydd uchaf De Cymru, Pen Y Fan. Os ydych chi’n teimlo’n heini, gallech gerdded rhai o’r llwybrau niferus. Mae hefyd yn lle gwych i roi cynnig ar geogelcio. Gyda geogelciau wedi’u cuddio ar draws y parc, mae’n lle da i blant fod yn egnïol ac mae’n lle da i ddiddanu plant.
Llwybr Arfordir Cymru
Mae Llwybr Arfordir Cymru yn ymestyn dros 870 o filltiroedd ac mae’n berffaith er mwyn mynd am dro fel teulu a gwylio bywyd gwyllt. Ymhlith yr uchafbwyntiau, ceir Ynys Llanddwyn ar Ynys Môn, man hudolus sy’n teimlo fel rhywle llawn lledrith, neu Lwybr Arfordir Sir Benfro, yr unig barc arfordirol yn y DU, sy’n cynnwys rhai o draethau prydferthaf Cymru.
Os ydych chi’n bwriadu mynd am dro gyda’r teulu, dyma ychydig gyngor i’ch cadw’n ddiogel. Sicrhewch eich bod yn gwisgo esgidiau addas i gerdded, gan wisgo haenau. Cynlluniwch eich taith cyn i chi gychwyn. Edrychwch ar ragolygon y tywydd ac ewch â digon o ddŵr, byrbrydau a map gyda chi. A chofiwch peidio â gwthio eich hun, ewch ar gyflymdra sy’n teimlo’n gyffyrddus. Wedi’r cyfan, rydych chi’n dymuno mwynhau eich diwrnod allan!
Anturiaethau hanesyddol
Castell Dryslwyn
Archwiliwch adfeilion Castell Dryslwyn yn Sir Gaerfyrddin. Mae hon yn berl llai adnabyddus, sy’n cynnig golygfeydd godidog o Ddyffryn Tywi ac mae’n lle gwych i fwynhau picnic fel teulu.
Amgueddfeydd Cenedlaethol Cymru
Manteisiwch ar fynediad am ddim i Amgueddfeydd Cenedlaethol Cymru. O’r Amgueddfa Genedlaethol i’r Amgueddfa Hanes Genedlaethol yng Nghaerdydd, mae rhywbeth i bawb. Ni chodir tâl mynediad i’r Amgueddfa Genedlaethol, ond codir tâl am barcio ac i weld rhai arddangosiadau, digwyddiadau a gweithgareddau.
Gwyliau a digwyddiadau
Gŵyl Caws Mawr
Ewch i Gaerffili i’r Ŵyl Caws Mawr ar 30 a 31 Awst i fwynhau penwythnos o ail-greu golygfeydd canoloesol, cerddoriaeth fyw ac, wrth gwrs, i flasu caws! Nifer fawr o stondinau, cerddoriaeth ac adloniant. Peidiwch ag anghofio y Ras Gaws, y gallwch gymryd rhan ynddi am ddim.
Gŵyl Jazz Aberhonddu
Bydd Aberhonddu yn fwrlwm o weithgarwch ar 8-10 Awst ar gyfer yr ŵyl jazz fyd-enwog. Er bod gofyn prynu tocyn ar gyfer nifer o’r cyngherddau, cynhelir amrywiaeth o ddigwyddiadau am ddim hefyd, sy’n ei wneud yn ddewis hygyrch i deuluoedd sy’n dymuno mwynhau cerddoriaeth fyw heb wario ffortiwn.
Profiadau unigryw
Gwylio dolffiniaid ym Mae Ceredigion
Er y gallwch dalu i fynd allan ar y môr mewn cwch, gallwch wylio dolffiniaid, llamhidyddion a morloi o ben y clogwyni ym Mae Ceredigion. Rhai o’r mannau poblogaidd yw Mwnt a Cheinewydd yng Ngheredigion. Mae’n brofiad hudolus y bydd plant yn ei gofio am flynyddoedd.
Parc Gwledig Margam
Bu’r parc hwn yn gartref i Eisteddfod yr Urdd ym mis Mai, ac mae’n safle prydferth sy’n cynnwys castell, gerddi addurnol a pharc ceirw. Ni chodir tâl mynediad ond codir £8.50 y dydd am barcio yno, ac efallai y codir tâl mynediad i fynychu digwyddiadau arbennig.
Cyngor er mwyn mwynhau haf rhesymol
- Byddwch yn glyfar wrth deithio: manteisiwch ar gynigion teithio am ddim i blant yng nghwmni oedolyn ar drenau Trafnidiaeth Cymru. Gall hyn wneud teithiau undydd yn fwy fforddiadwy a chyfleus.
- Paciwch bicnic: mae nifer o’r atyniadau hyn yn berffaith er mwyn mwynhau picnic fel teulu. Dewch â’ch bwyd eich hun i arbed arian a mwynhau pryd o fwyd gyda golygfa.
- Cynlluniwch ymlaen llaw: efallai y bydd gofyn archebu lle mewn rhai digwyddiadau a gweithgareddau ymlaen llaw, hyd yn oed os ydynt ar gael am ddim. Trowch at wefannau digwyddiadau am fanylion er mwyn sicrhau na fyddwch yn colli allan.
Gyda chymaint o weithgareddau a digwyddiadau am ddim, ewch ati i archwilio!